ذكرى صرت لخاطري ..بقلمي جبار الشمري

ذكرى صرت لخاطري
أنساك ما كمت أستعيد
يلي جنت لناظري
دنيتي والعيد السعيد
أبد ما جنها سنة
ماشفت بيها الهنة
شتفيد يالبسي الجديد
ذكرى صرت لخاطري
والجرح مايرضى يهيد
يا بسمتي وسلوتي
ويا فرحتي ولهفتي
ليش رحت انتة بعيد
ذكرى صرت لخاطري
والفكر مشدوه وشريد
رحت عني بلا عذر
النار أرحم والجمر
والفركة تحرك لو تزيد
ذكرى صرت لخاطري
ويا دمعتي من حديد
عودلي قرب تعال
انتة يلكلك دلال
تدري بعدك بيش أجيد
ذكرى صرت لخاطري
والبعد لو طول يبيد
خلي نرجع من جديد
عشرة وليوم الوعيد
يا حبيبي الماكو منك
انتة منك بس أريد
ذكرى صرت لخاطري
أنساك ماكمت أستعيد

بقلمي
جبار الشمري